आदिवासी व ग्रामीण भागातील महिला-बालकांच्या आरोग्यसेवेला बळकटी देण्याची मागणी; वैद्यकीय अधिकारी, परिचारिका व तंत्रज्ञांची पदे भरण्यासाठी प्रस्ताव पाठवण्याच्या सूचना

गडचिरोली/अहेरी, दि. १३ ऑगस्ट :
अहेरी येथील महिला व बाल रुग्णालयातील आरोग्यसेवेचा आढावा घेताना मनुष्यबळाच्या कमतरतेचा मुद्दा ऐरणीवर आला आहे. भाजपा आदिवासी मोर्चाचे प्रदेशाध्यक्ष तथा माजी आमदार डॉ. देवराव होळी यांनी रुग्णालयाची पाहणी करून उपलब्ध वैद्यकीय सुविधा, रुग्णांना मिळणाऱ्या सेवा तसेच विविध विभागांतील रिक्त पदांची माहिती जाणून घेतली.

अहेरी व परिसरातील आदिवासी आणि ग्रामीण भागातून महिला व बाल रुग्ण मोठ्या संख्येने या रुग्णालयात उपचारासाठी येतात. मात्र आवश्यक मनुष्यबळ उपलब्ध नसल्यास आरोग्यसेवेवर त्याचा थेट परिणाम होण्याची शक्यता आहे. ही बाब लक्षात घेऊन वैद्यकीय अधिकारी, परिचारिका, तंत्रज्ञ तसेच इतर आवश्यक रिक्त पदे तातडीने भरण्यात यावीत, अशा स्पष्ट सूचना डॉ. होळी यांनी वैद्यकीय अधीक्षकांना दिल्या.

रुग्णालयातील कोणत्याही विभागात कर्मचाऱ्यांची कमतरता राहून रुग्णांना गैरसोय होऊ नये, यासाठी आवश्यक नियोजन करण्याचे निर्देशही त्यांनी दिले. तसेच रिक्त पदांची संपूर्ण माहिती आणि आवश्यक मनुष्यबळाचा मागणी प्रस्ताव वरिष्ठ अधिकाऱ्यांकडे तातडीने सादर करून त्याचा सातत्याने पाठपुरावा करण्यास सांगितले.

“अहेरीसह परिसरातील आदिवासी व ग्रामीण नागरिकांसाठी हे रुग्णालय अत्यंत महत्त्वाचे आहे. विशेषतः महिला आणि बालकांना वेळेत, सुरक्षित आणि दर्जेदार उपचार मिळणे आवश्यक आहे. त्यामुळे रुग्णालयातील आरोग्यसेवा अधिक सक्षम करण्यासाठी आवश्यक त्या सर्व उपाययोजना झाल्या पाहिजेत,” अशी भूमिका डॉ. देवराव होळी यांनी यावेळी मांडली.

पाहणीदरम्यान वैद्यकीय अधीक्षक डॉ. अनिल गेडाम, डॉ. शिवा कुंभारे, भाजपा तालुकाध्यक्ष अजय ठाकरे, पप्पू मदिवार यांच्यासह रुग्णालयातील डॉक्टर, अधिकारी व कर्मचारी उपस्थित होते.

मनुष्यबळाचा प्रश्न सुटणार का?

अहेरीच्या महिला व बाल रुग्णालयावर परिसरातील नागरिकांची मोठी आरोग्यविषयक भिस्त आहे. त्यामुळे रिक्त पदे तातडीने भरून आवश्यक वैद्यकीय मनुष्यबळ उपलब्ध झाल्यास महिला व बालकांना अधिक सक्षम आणि वेळेवर उपचार मिळण्यास मोठी मदत होणार आहे.