भ्रष्टाचाराविरोधात FIR करणाऱ्या अधिकाऱ्याच्या निलंबनाची मागणी; उपोषणकर्त्यांवरही पक्षाचा निशाणा — मागणी मान्य न झाल्यास शेकडो नागरिकांसह आंदोलनाचा इशारा

कुरखेडा | प्रतिनिधी :
कुरखेडा पंचायत समितीच्या कारभारात सध्या राजकीय आणि प्रशासकीय संघर्षाचे वातावरण निर्माण झाले आहे. सावलखेडा ग्रामपंचायतीतील ग्रामसेवक व सरपंचांविरोधात FIR दाखल केल्यानंतर पंचायत समितीचे सहाय्यक गटविकास अधिकारी (ABDO) देवांश उराडे चर्चेच्या केंद्रस्थानी आले आहेत. त्यांच्या निलंबनाच्या मागणीसाठी काही माजी सरपंच व सरपंचांकडून उपोषण सुरू करण्यात आल्याच्या पार्श्वभूमीवर आजाद समाज पार्टीने उराडे यांच्या समर्थनार्थ भूमिका घेतली आहे.

भ्रष्टाचार किंवा गैरप्रकारांविरोधात कारवाई करणाऱ्या अधिकाऱ्यावरच दबाव आणण्याचा प्रयत्न होत असेल, तर हा प्रकार गंभीर असल्याचे आजाद समाज पार्टीने म्हटले आहे. संबंधित ग्रामपंचायतीच्या कारभाराची चौकशी करण्याऐवजी कारवाई करणाऱ्या अधिकाऱ्याच्या निलंबनाची मागणी करणे योग्य नसल्याची भूमिका पक्षाने घेतली आहे.

‘कारवाई करणाऱ्या अधिकाऱ्यालाच लक्ष्य का?’

सावलखेडा येथील प्रकरणात ग्रामसेवक व सरपंचांविरोधात FIR दाखल झाल्यानंतर उराडे यांच्या निलंबनाची मागणी पुढे आली. या पार्श्वभूमीवर आजाद समाज पार्टीने प्रशासनाने संपूर्ण प्रकरणाची निष्पक्ष चौकशी करावी, अशी मागणी केली आहे.

ग्रामपंचायतीच्या कारभारात गैरप्रकार झाला आहे की नाही, हे चौकशीतून स्पष्ट होऊ शकते. त्यामुळे कारवाई करणाऱ्या अधिकाऱ्यावर दबाव आणण्याऐवजी संबंधित ग्रामपंचायतींच्या आर्थिक व प्रशासकीय कारभाराची चौकशी करण्याची गरज असल्याचे पक्षाने म्हटले आहे.

सर्व संबंधित ग्रामपंचायतींच्या चौकशीची मागणी

या प्रकरणी आजाद समाज पार्टीच्या वतीने जिल्हा परिषदेच्या मुख्य कार्यकारी अधिकाऱ्यांना निवेदन देण्यात आले. सीईओ दौऱ्यावर असल्याने हे निवेदन उपमुख्य कार्यकारी अधिकारी पंकज भोयर यांच्याकडे सुपूर्द करण्यात आले.

निवेदनातून ABDO देवांश उराडे यांच्यावर दबाव आणण्याऐवजी उपोषण करणाऱ्या संबंधित ग्रामपंचायतींच्या कारभाराची निष्पक्ष चौकशी करावी, अशी मागणी करण्यात आली. तसेच, दोष आढळल्यास संबंधितांवर नियमानुसार कारवाई करावी, अशी भूमिका पक्षाने मांडली.

‘राजकीय दबावापुढे प्रशासन झुकू नये’

आजाद समाज पार्टीचे जिल्हाप्रभारी विनोद मडावी यांनी प्रशासनाला इशारा देताना सांगितले की, भ्रष्टाचाराविरोधात कारवाई करणाऱ्या अधिकाऱ्याच्या पाठीशी उभे राहण्याऐवजी त्याच्यावर दबाव आणला जात असेल, तर हा प्रकार खपवून घेतला जाणार नाही.

ग्रामपंचायती भ्रष्टाचाराचे अड्डे बनू नयेत, यासाठी आजाद समाज पार्टी जनतेच्या बाजूने लढणार असल्याचे त्यांनी स्पष्ट केले. तसेच, उपोषण मागे घेतले नाही आणि कारवाई करणाऱ्या अधिकाऱ्यावर दबाव आणण्याचा प्रयत्न सुरूच राहिला, तर शेकडो नागरिकांना सोबत घेऊन भ्रष्टाचाराविरोधात आंदोलन छेडण्याचा इशारा पक्षाच्या वतीने देण्यात आला.

आता निलंबनाचा मुद्दा की कारभाराच्या चौकशीचा?

या संपूर्ण प्रकरणामुळे कुरखेडा पंचायत प्रशासनातील कारभार आणि राजकीय हस्तक्षेपाचा मुद्दा ऐरणीवर आला आहे. प्रशासनाने कोणत्याही दबावाला बळी न पडता सावलखेडा प्रकरणाची निष्पक्ष चौकशी करावी आणि वस्तुस्थिती जनतेसमोर आणावी, अशी मागणी आजाद समाज पार्टीने केली आहे.

दरम्यान, वरिष्ठ अधिकाऱ्यांनी प्रामाणिकपणे काम करणाऱ्या अधिकाऱ्यांच्या पाठीशी उभे राहावे. अन्यथा भविष्यात गैरप्रकार करणाऱ्यांचे मनोबल वाढण्याची शक्यता असल्याचेही पक्षाने म्हटले आहे.

निवेदन देताना आजाद समाज पार्टीचे जिल्हाध्यक्ष राज बन्सोड, युवा जिल्हाध्यक्ष विवेक खोब्रागडे, सचिव सुरेंद्र वासनिक, वडसा तालुका युवा अध्यक्ष मंगेश बन्सोड, गडचिरोली तालुकाध्यक्ष नितेश वेस्कडे यांच्यासह कुरखेडा परिसरातील नागरिक व ग्रामपंचायत सदस्य उपस्थित होते.