गणेशोत्सवासाठी चामोर्शी पोलीस सज्ज; शहरात रूटमार्च, आष्टी चौकात जमाव नियंत्रणाचा सराव.

५ अधिकारी, १७ अंमलदार आणि ६१ होमगार्डांचा सहभाग; शांतता व सुव्यवस्था राखण्याचे पोलिसांचे आवाहन

चामोर्शी, दि. १३ सप्टेंबर : गणेशोत्सव आणि विसर्जन मिरवणुकीच्या पार्श्वभूमीवर चामोर्शी पोलीस प्रशासनाने सुरक्षा व्यवस्थेची तयारी सुरू केली आहे. उत्सवादरम्यान कायदा व सुव्यवस्था अबाधित राहावी, यासाठी रविवारी सायंकाळी शहरातील प्रमुख मिरवणूक मार्गांवर पोलिसांकडून रूटमार्च काढण्यात आला.
पोलीस निरीक्षक महादेव ढाकणे यांच्या मार्गदर्शनाखाली सायंकाळी ५ ते ६ वाजेदरम्यान हा रूटमार्च पार पडला. यावेळी पोलिसांनी शहरातील प्रमुख मार्ग, गर्दीची संभाव्य ठिकाणे, संवेदनशील भाग आणि विसर्जन मिरवणुकीच्या मार्गाची पाहणी केली. वाहतूक नियंत्रण तसेच आपत्कालीन परिस्थितीत पोलिसांची हालचाल याबाबतही आढावा घेण्यात आला.
आष्टी चौकात जमाव नियंत्रणाचे प्रात्यक्षिक
रूटमार्चनंतर आष्टी चौकात जमाव नियंत्रणाचे प्रात्यक्षिक घेण्यात आले. गणेश विसर्जन मिरवणुकीदरम्यान अचानक मोठी गर्दी निर्माण झाल्यास, वादाची परिस्थिती उद्भवल्यास किंवा कायदा-सुव्यवस्थेचा प्रश्न निर्माण झाल्यास पोलिसांनी तातडीने परिस्थिती कशी हाताळावी, याचा प्रत्यक्ष सराव करण्यात आला.
या सरावामुळे संभाव्य अनुचित परिस्थितीवर नियंत्रण मिळविण्यासाठी पोलिस दलाची कार्यक्षमता आणि समन्वय तपासण्यात आला.
८३ पोलिस कर्मचारी व होमगार्डांचा सहभाग
या रूटमार्च आणि जमाव नियंत्रणाच्या सरावात ५ पोलीस अधिकारी, १७ पोलीस अंमलदार आणि ६१ होमगार्ड, असे एकूण ८३ अधिकारी-कर्मचारी सहभागी झाले. मोठ्या संख्येने सुरक्षा यंत्रणा रस्त्यावर उतरल्याने शहरात पोलिसांचा कडेकोट बंदोबस्त असल्याचे चित्र दिसून आले.
अफवांवर विश्वास न ठेवण्याचे आवाहन
गणेशोत्सव शांततेत आणि उत्साहात पार पडण्यासाठी नागरिकांनी पोलिस प्रशासनाला सहकार्य करावे. मिरवणुकीदरम्यान नियमांचे पालन करावे, अफवांवर विश्वास ठेवू नये तसेच कोणतीही संशयास्पद बाब आढळल्यास तातडीने पोलिसांना माहिती द्यावी, असे आवाहन पोलीस प्रशासनाकडून करण्यात आले आहे.
गणेशोत्सवाच्या पार्श्वभूमीवर रूटमार्च आणि जमाव नियंत्रणाच्या सरावातून चामोर्शी पोलिसांची उत्सव काळातील सुरक्षा व्यवस्थेसाठीची तयारी स्पष्ट झाली आहे.