आष्टी येथील पुलिया दुरुस्तीचे काम तीन महिन्यांपासून अपूर्ण – आझाद समाज पार्टीचा आरोप.
निकृष्ट दर्जाच्या बांधकामाचा आरोप; आझाद समाज पार्टीच्या पदाधिकाऱ्यांकडून प्रत्यक्ष पाहणी
आष्टी : आष्टी येथील पुलिया दुरुस्तीचे काम सुरू होऊन तब्बल तीन महिने उलटूनही अद्याप पूर्ण झालेले नाही. त्यामुळे नागरिकांना मोठ्या अडचणींचा सामना करावा लागत असून, संबंधित कामाच्या दर्जाबाबतही प्रश्नचिन्ह निर्माण झाले आहे.
या पार्श्वभूमीवर आझाद समाज पार्टीचे जिल्हाध्यक्ष विवेक खोब्रागडे तसेच पक्षाच्या पदाधिकाऱ्यांनी पुलियाच्या कामाची प्रत्यक्ष पाहणी केली. पाहणीदरम्यान सुरू असलेल्या कामाची स्थिती, बांधकामाची गुणवत्ता आणि कामातील विलंब याबाबत पदाधिकाऱ्यांनी पाहणी करून संबंधित यंत्रणेच्या कार्यपद्धतीवर प्रश्न उपस्थित केले.
पुलियाच्या दुरुस्तीचे काम निर्धारित कालावधीत पूर्ण न झाल्याने नागरिकांमध्ये नाराजी व्यक्त होत आहे. तसेच बांधकामामध्ये वापरण्यात येणारे साहित्य आणि कामाच्या गुणवत्तेबाबत निकृष्ट दर्जाच्या बांधकामाचे आरोप करण्यात आले आहेत. त्यामुळे संबंधित विभागाने या कामाची तांत्रिक तपासणी करून वस्तुस्थिती स्पष्ट करावी, अशी मागणी करण्यात आली आहे.
पुलियाचे काम लवकरात लवकर पूर्ण करून नागरिकांना दिलासा द्यावा तसेच कामाचा दर्जा तपासून दोष आढळल्यास संबंधितांवर कारवाई करावी, अशी मागणी आझाद समाज पार्टीचे जिल्हाध्यक्ष विवेक खोब्रागडे व पदाधिकाऱ्यांनी केली आहे.
दरम्यान, या कामाबाबत संबंधित सार्वजनिक बांधकाम विभागाने तातडीने दखल घेऊन कामाची पाहणी करावी आणि काम पूर्ण करण्यासाठी आवश्यक कार्यवाही करावी, अशी मागणी नागरिकांकडूनही होत आहे.
