आष्टीला अप्पर तहसील कार्यालय कधी? शासन आदेशातून नाव गायब; ३४ ते ४५ किमीच्या प्रवासाचा नागरिकांना फटका.

आष्टी | प्रतिनिधी

चामोर्शी तालुक्यातील मोठ्या गावांपैकी एक असलेल्या आष्टीला अप्पर तहसील कार्यालय मंजूर झाल्याची चर्चा असतानाच, २२ सप्टेंबर रोजी जारी झालेल्या शासन आदेशात आष्टीचा स्पष्ट उल्लेख नसल्याने प्रशासकीय निर्णयावरच प्रश्नचिन्ह निर्माण झाले आहे. उद्घाटनाच्या प्रतीक्षेत असल्याचे सांगितले जाणारे कार्यालय अद्याप प्रत्यक्षात सुरू झाले नसल्याने आष्टी परिसरातील नागरिकांची गैरसोय कायम आहे.

महसूल व इतर प्रशासकीय कामांसाठी आष्टी परिसरातील नागरिकांना सुमारे ३४ किलोमीटरचा प्रवास करून चामोर्शी गाठावे लागते, तर काही दुर्गम गावांतील नागरिकांना तब्बल ४० ते ४५ किलोमीटरचे अंतर पार करावे लागते. त्यामुळे वेळ, प्रवासाचा खर्च आणि श्रम यांचा अतिरिक्त भार नागरिकांवर पडत आहे.

मंजुरीच्या चर्चेनंतरही प्रत्यक्ष कार्यालय कुठे?

आष्टी येथे अप्पर तहसील कार्यालय सुरू करण्याची मागणी नवीन नाही. प्रशासकीय सोय आणि भौगोलिक परिस्थिती लक्षात घेता या कार्यालयाची आवश्यकता असल्याचे नागरिकांकडून सातत्याने सांगितले जात आहे. मात्र, शासन आदेशात आष्टीचा उल्लेख नसल्याने मंजुरीपासून प्रत्यक्ष अंमलबजावणीपर्यंत नेमकी अडचण कुठे आहे? असा सवाल उपस्थित होत आहे.

कार्यालय सुरू करण्यासाठी कोणती प्रशासकीय प्रक्रिया अद्याप प्रलंबित आहे? आष्टीचा शासन आदेशात समावेश का करण्यात आला नाही? आणि नागरिकांना आणखी किती काळ चामोर्शीचा प्रवास करावा लागणार? या प्रश्नांची उत्तरे प्रशासनाकडून अपेक्षित आहेत.

प्रशासकीय सुविधेपासून आष्टी परिसर वंचितच?

आष्टी परिसरातील अनेक गावांतील नागरिकांना शासकीय कामांसाठी वारंवार चामोर्शी येथे जावे लागते. ग्रामीण भागातील नागरिक, महिला, ज्येष्ठ नागरिक आणि शेतकऱ्यांसाठी हा प्रवास अधिक त्रासदायक ठरत असल्याचे नागरिकांचे म्हणणे आहे.

त्यामुळे आष्टीला अप्पर तहसील कार्यालयाचा स्पष्ट समावेश करून प्रत्यक्ष कार्यालय सुरू करण्यासाठी शासनाने तातडीने निर्णय घ्यावा, अशी मागणी परिसरातून जोर धरत आहे.

आष्टीचा उल्लेख शासन आदेशातून का वगळला? मंजूर कार्यालय प्रत्यक्षात कधी सुरू होणार?
या प्रश्नांकडे आता महसूल प्रशासन आणि शासनाचे लक्ष लागले आहे.