बुद्धिबळात अंजली होडकेची जिल्ह्यात बाजी; विभागीय स्पर्धेसाठी नागपूरला निवड.

 गडचिरोली

चामोर्शी : शालेय क्रीडा स्पर्धेंतर्गत आयोजित जिल्हास्तरीय बुद्धिबळ स्पर्धेत चामोर्शी येथील शिवाजी विद्यालयाच्या इयत्ता ११ वी विज्ञान शाखेतील विद्यार्थिनी कु. अंजली रामेश्वर होडके हिने उत्कृष्ट कामगिरी करत जिल्ह्यात प्रथम क्रमांक पटकावला. या यशामुळे तिची आता विभागीय स्तरावरील स्पर्धेसाठी नागपूर येथे निवड झाली आहे.

बुद्धिबळातील संयम, एकाग्रता आणि डावपेचांची प्रभावी सांगड घालत अंजलीने स्पर्धेत दमदार खेळाचे प्रदर्शन केले. प्रतिस्पर्ध्यांच्या आव्हानांवर मात करत तिने जिल्हास्तरावर अव्वल स्थान मिळविले.

अंजलीच्या या यशामुळे शिवाजी विद्यालयाच्या शिरपेचात आणखी एक मानाचा तुरा रोवला गेला आहे. तिच्या कामगिरीबद्दल पालक, शिक्षक, शिक्षकेतर कर्मचारी आणि सहविद्यार्थ्यांकडून अभिनंदनाचा वर्षाव होत आहे.

शैक्षणिक गुणवत्तेसोबतच क्रीडा क्षेत्रातही विद्यार्थ्यांनी प्रगती करावी, यासाठी विद्यालयाकडून विविध क्रीडा प्रकारांना प्रोत्साहन दिले जाते. त्याच प्रोत्साहनाला प्रतिसाद देत अंजलीने बुद्धिबळाच्या पटावर आपली गुणवत्ता सिद्ध केली आहे.

जिल्हास्तरावरील यशानंतर आता नागपूर येथे होणाऱ्या विभागीय स्पर्धेत अंजलीकडून चांगल्या कामगिरीची अपेक्षा व्यक्त केली जात आहे. तिच्या पुढील वाटचालीसाठी विद्यालय परिवारासह क्रीडाप्रेमींनी शुभेच्छा दिल्या आहेत.