गडचिरोलीत १३ सप्टेंबरला ‘छात्रों की गूंज’ भव्य मॅरेथॉन.

पुरुष, महिला आणि १५ वर्षांखालील मुला-मुलींसाठी स्वतंत्र गट; प्रत्येक सहभागीला टी-शर्ट व प्रमाणपत्र

गडचिरोली, दि. ५ सप्टेंबर : युवकांमध्ये आरोग्यदायी जीवनशैली, नियमित व्यायाम आणि क्रीडा संस्कृती रुजविण्याच्या उद्देशाने ‘छात्रों की गूंज’ भव्य मॅरेथॉन स्पर्धेचे आयोजन १३ सप्टेंबर २०२६ रोजी गडचिरोली शहरात करण्यात आले आहे. सकाळी ६ वाजता स्पर्धेला सुरुवात होणार असून, जिल्ह्यासह बाहेरील धावपटूंनीही मोठ्या संख्येने सहभागी व्हावे, असे आवाहन आयोजकांनी केले आहे.
मॅरेथॉनची सुरुवात शिवाजी महाविद्यालय येथून होऊन आय.टी.आय. चौक मार्गे पुन्हा शिवाजी महाविद्यालय येथे स्पर्धेचा समारोप होणार आहे.
खुल्या गटातील विजेत्यांना रोख बक्षिसे
स्पर्धेत पुरुष आणि महिला अशा स्वतंत्र खुल्या गटांची निर्मिती करण्यात आली आहे. दोन्ही गटांतील प्रथम क्रमांकाच्या विजेत्याला प्रत्येकी ५१ हजार रुपये, द्वितीय क्रमांकासाठी ३१ हजार रुपये, तर तृतीय क्रमांकासाठी २१ हजार रुपये बक्षीस देण्यात येणार आहे. याशिवाय प्रत्येक खुल्या गटात १० प्रोत्साहनपर बक्षिसेही ठेवण्यात आली आहेत.
१५ वर्षांखालील मुला-मुलींसाठीही संधी
१५ वर्षांखालील मुला-मुलींसाठी स्वतंत्र गट ठेवण्यात आला असून, या गटातील प्रथम तीन विजेत्यांना अनुक्रमे ३१ हजार, २१ हजार आणि ११ हजार रुपये बक्षिसे दिली जाणार आहेत. या गटासाठीही प्रोत्साहनपर बक्षिसांची व्यवस्था करण्यात आली आहे.
सहभागी धावपटूंना टी-शर्ट व प्रमाणपत्र
मॅरेथॉनमध्ये सहभागी होणाऱ्या प्रत्येक धावपटूला टी-शर्ट आणि सहभाग प्रमाणपत्र देण्यात येणार आहे. स्पर्धेत सहभागी होण्यासाठी आधार कार्डाची छायांकित प्रत देणे आवश्यक असल्याचे आयोजकांनी स्पष्ट केले आहे.
विविध संस्थांचा पुढाकार
अॅड. दुष्यंत नामदेव किरसान मित्र परिवार, काँग्रेस पक्ष आणि गुरुकुल करिअर अकॅडमी, गडचिरोली यांच्या संयुक्त विद्यमाने या मॅरेथॉनचे आयोजन करण्यात आले आहे. स्पर्धेबाबत अधिक माहितीसाठी पुष्पक सेलोकर सर (संचालक व मार्गदर्शक) यांच्याशी संपर्क साधण्याचे आवाहन करण्यात आले आहे.
आरोग्य, व्यायाम आणि क्रीडा क्षेत्राला चालना देणाऱ्या या उपक्रमात युवक-युवती, विद्यार्थी तसेच क्रीडाप्रेमींनी मोठ्या संख्येने सहभागी व्हावे, असे आवाहन आयोजकांनी केले आहे.