वनहक्क पट्ट्यांच्या प्रश्नाला गती; धानोरा तालुक्यात गावोगावी शिबिरांचे आयोजन!

धानोरा | प्रतिनिधी

धानोरा तालुक्यातील वनहक्क पट्ट्यांपासून वंचित असलेल्या पात्र लाभार्थ्यांना वनहक्क पट्टे मिळावेत, या मागणीसाठी बहुजन रिपब्लिकन सोशलिस्ट पार्टी (BRSP) च्या वतीने सातत्याने पाठपुरावा करण्यात येत आहे. या मागणीसंदर्भात ५ सप्टेंबर २०२६ रोजी निवेदन देऊन चर्चा करण्यात आली होती. या निवेदनाची दखल घेत धानोरा येथील तहसीलदार माळी यांनी पुढाकार घेत तालुक्यातील विविध गावांमध्ये वनहक्क दाव्यांसंदर्भात शिबिरांचे आयोजन करण्याचे ठरविले. त्यामुळे वनहक्क पट्ट्यांच्या प्रतीक्षेत असलेल्या नागरिकांना दिलासा मिळण्याची आशा निर्माण झाली आहे.

BRSP च्या वतीने वनहक्क पट्ट्यांचा प्रश्न मार्गी लावण्यासाठी प्रशासनाकडे पाठपुरावा करण्यात आला होता. त्यानंतर संबंधित प्रशासनाने विविध गावांमध्ये शिबिरे आयोजित करण्याची कार्यवाही सुरू केली. या शिबिरांमध्ये वनहक्क दाव्यांशी संबंधित प्रकरणे तपासून घेण्यात येणार असून, काही प्रकरणे शिल्लक राहिल्यास त्यांच्यासाठी पुन्हा शिबिरे आयोजित करून दावे निकाली काढण्याबाबत आश्वासन देण्यात आले आहे.

या प्रक्रियेसंदर्भात शासन आणि जिल्हा प्रशासनाच्या स्तरावर विविध पत्रे व आदेश जारी करण्यात आले आहेत. त्यामध्ये महाराष्ट्र शासनाच्या महसूल व वन विभागाचे शासन परिपत्रक दिनांक १० सप्टेंबर २०२६, जिल्हाधिकारी गडचिरोली यांचे १६ सप्टेंबरचे पत्र, सहाय्यक जिल्हाधिकारी तथा प्रकल्प अधिकारी गडचिरोली यांचे १८ सप्टेंबरचे पत्र, जिल्हाधिकाऱ्यांचा ५ ऑक्टोबर २०२६ रोजीचा दूरध्वनी संदेश तसेच तहसील कार्यालयाचा ५ ऑक्टोबरचा आदेश यांचा समावेश आहे. याशिवाय, BRSP जिल्हा गडचिरोलीच्या वतीने ५ ऑक्टोबर २०२६ रोजी पुन्हा निवेदन सादर करून या प्रश्नाकडे प्रशासनाचे लक्ष वेधण्यात आले.

वनहक्क पट्टे मिळणे हा आदिवासी व इतर पात्र वननिवासी कुटुंबांच्या हक्कांशी संबंधित महत्त्वाचा विषय आहे. त्यामुळे केवळ शिबिरांचे आयोजन न करता पात्र लाभार्थ्यांचे प्रलंबित दावे नियमानुसार तपासून त्यांना लवकरात लवकर न्याय मिळावा, अशी अपेक्षा व्यक्त होत आहे.

दरम्यान, वनहक्क पट्ट्यांच्या प्रश्नावर दखल घेऊन गावोगावी शिबिरे आयोजित करण्यासाठी पुढाकार घेतल्याबद्दल बहुजन रिपब्लिकन सोशलिस्ट पार्टीच्या वतीने तहसीलदार माळी यांचे अभिनंदन करण्यात आले. तसेच वनहक्क पट्ट्यांपासून वंचित असलेल्या नागरिकांना त्यांचे हक्क मिळवून देण्यासाठी सहकार्य केल्याबद्दल त्यांचे आभार मानण्यात आले.

आता प्रलंबित वनहक्क दाव्यांची प्रक्रिया गतीने पूर्ण होऊन पात्र लाभार्थ्यांना प्रत्यक्ष वनहक्क पट्टे मिळतात का, याकडे धानोरा तालुक्यातील नागरिकांचे लक्ष लागले आहे.